عشان نقوم م الحقيقة //حسين راشد

حسين راشد

عشان نقوم م الحقيقة

ونعرف نحلم كويس
لازملنا يوم طويل
وأزميل
نرسم بيه الطريق
ع الجبين
و شاكوش صغير
ندقدق كل لخلخة المشاعر
و نركب بدال الصور
أصول
نطول بأيدنا القلم
اللي طاير فوق
تحت رجلينا

عشان نفوق من الحقيقة
ونجهل كل المعارف
نخالف ؟
ولا نبتعد !
نعكر كاس الخلايق
ولا نضايق
الموعود
ونعود
نآمن باللي حفظاه القلوب
ولا ندوب
و يدوب نلامس
نفوس تعب
اه يا قلبي الجريح
ما كنتش ريح ..
ولا كانت
فكرة الحلم حقايق
آه يا عقلي
ياللي عقلت على الغلط
وبقيت رمل وزلط
والمونة مغشوشة
أتصبت عبط في عبط
على سقف وجداني

إن قلت أحكم غيري
القاه زيي مريض
والداء اللي صاب وريدي
نفس العرض
و الألم
ونفس الاطبة الفشلة
اللي اتعلموا زينا
واتصب في وجدانهم
أصل المرض

فأزاي هنصحى
وأزاي هنقدر نعيش
ومفيش من الحقايق
غير أننا
عيانيين بداء الحلم
واللي بتطوله أيدينا
نهش الكلام
نهش المشاعر
نهش العيون
والضمير
خرس
في كل الأمكنة
مستنين
أي حاجة

حلم كان ولا حقيقة
مش مهم
المهم
أننا
على نفس الطريق
مصفوفين
مستنين
قرص الشمس يطلع
من تحت الجبين
او حتى ينزل

نكسر المونة الغبية
ونسيب الصغار يعلمونا
الفرق أيه